Gjykata Themelore në Prishtinë ka lëshuar urdhëresë për verifikim adrese ndaj Agron Kryeziut, i cili po akuzohet se kanosi ish-kryeshefin e Operatorit i Sistemit, Transmisionit dhe Tregut të energjisë elektrike të Kosovës, për shkak se gruaja e tij punëtore në këtë kompani ka qenë e pakënaqur me vendimet e këtij të fundit.
Vendimi i tillë është marrë nga gjykatësi Adnan Kamberi, pasi i akuzuari Kryeziu mungoi në seancën e së enjtes, pasi në fletëkthesën e kthyer në gjykatë nga Posta e Kosovës, rezulton adresa jo e plotë.
Ndërsa, i pranishëm në këtë seancë ishte prokurori Eset Rama.
Pasi që nuk u plotësuan kushtet për mbajtjen e shqyrtimit fillestar, seanca e sotme është shtyrë për kohë të pacaktuar, raporton “Betimi për Drejtësi”.
Sipas aktakuzës së ngritur në maj të 2019-së, nga Prokuroria Themelore në Prishtinë, ngarkon Agron Kryeziun se më 17 maj 2017, në Prishtinë, me dashje, seriozisht ka kanosur përmes email-it elektronik të dëmtuarin, shefin të departamentit ekzekutiv në KOST, Ilir Shalën.
Tutje, në akuzues thuhet se me qëllim të frikësimit e ka kanosur me fjalë: “o magjup po të shkruaj me emër e mbiemër, mos luj se je tu lujt me pozitën e kokën tënde, kam edhe unë të njofshëm që shkarkohesh për 24 orë, e kam me i përdor. Pyete Petrit Pepaj se më njeh mirë, e din ai fortë mirë kan e kam, nëse nuk kryen punë të njofshmit. Unë e kam me kry punë me ty dhe me atë që pretendon pozitën, me atë magjupin e Fadil mutit. Hiq mos ke gajle se edhe belben ka me ta rehatu se krejt hajna jeni. Hajna, po ta përmendi vetëm shpin, po të betohem në familje se ajo që ti mendon ska me ndodhë”.
Në aktin akuzues thuhet se arsyeja e kësaj kanosje ka qenë sepse gruaja e të pandehurit Kryeziu është punëtore në KOST dhe kishte qenë e pakënaqur në KOST dhe se e njëjta ka qenë e pakënaqur me vendimet e marra nga ana e kryeshefit ekzekutiv, të dëmtuarit Ilir Shala. Me ç’rast tek i dëmtuari Shala është shfaqur ndenja e frikës, ankthit dhe pasigurisë për jetë.
Për këtë, Agron Kryeziu po akuzohet për veprën penale “Kanosja” nga neni 185 paragrafi 3 lidhur me par.2 të Kodit Penal, vepër kjo e cila është e dënueshme me burgim prej gjashtë muaj deri në pesë vjet, sipas Kodit që ishte në fuqi në kohën kur është kryer vepra penale.
