Nënat e Diyarbakır-it që vazhdojnë të protestojnë duke qëndruar para ndërtesës së partisë HDP (Partia Demokratike e Popujve) për fëmijët e tyre të rrëmbyer në male, me rastin e 3-vjetorit të protestës së tyre zhvilluan një marshim të emërtuar “Ndal terrorizmit, mallkim PKK-së”, transmeton KosovaPost.
Familjet të cilat bëjnë përgjegjës partinë HDP për rrëmbimin e fëmijëve të tyre, vazhdojnë protestën duke qëndruar të ulur para selisë së HDP-së në qytetin Diyarbakır të Turqisë që nga data 3 shtator 2019. Familjet që tashmë kanë hyrë në vitin e 3-të të protestës së tyre, organizuan një marshim kundër terrorizmit.
Në marshim morën pjesë edhe ministrja për Familjen dhe Shërbimet Sociale, Derya Yanık, zv.ministri i Brendshëm, Muhterem İnce, guvernatori i qytetit Diyarbakır, Münir Karaloğlu, deputetët e AK Partisë për qytetin Diyarbakır, Mehdi Eker dhe Oya Eronat, kreu i partisë AK për qytetin Diyarbakır, Muhammet Şerif Aydın, kreu i sindikatës Memur Sen, Ali Yalçın si dhe përfaqësues të tjerë nga organizatat e shoqërisë civile. Nënat të cilat marshimin e tyre e filluan përpara ndërtesës së selisë së HDP-së, mbajtën në duar pankartat me mbishkrimet: “Mjaft tani, fjala u takon nënave”, “Nënat në ruajtje”, “Mjaft tani, lironi bijtë tanë”.
Po ashtu nënat duke mbajtur në duar flamuj turq dhe fotografitë e fëmijëve të tyre që u janë rrëmbyer, hodhën sloganet “Dëshmorët nuk vdesin, atdheu nuk ndahet”, “Revolta e nënave do të triumfojë ndaj PKK-së”, “Turqit dhe kurdët janë vëllezër, PKK-ja është tradhtare”, “Poshtë PKK”.
Marshimit i dhanë mbështetje edhe prindër të cilëve u janë rrëmbyer fëmijët nga shumë qytete të tjera të Turqisë, përfaqësues të organizatave të shoqërisë civile si dhe qytetarët./AA
