Një ditë para skadimit të moratoriumit të vendosur para një viti, Shtetet e Bashkuara të Amerikës kanë inkurajuar palët ta shqyrtojnë mundësinë e vazhdimit të tij. Si arsye është përmendur rëndësia që dialogu i Brukselit të finalizohet me një marrëveshje gjithëpërfshirëse e përqendruar në njohjen reciproke. Nga Qeveria e Kosovës nuk kanë treguar nëse do të përfillet ky sugjerim i amerikanëve.
Departamenti i Shtetit Amerikan ka inkurajuar Kosovën dhe Serbinë që të vazhdojnë me moratoriumin mbi çështjet e njohjes dhe aplikimeve në organizata ndërkombëtare për shkak të ndërlikimeve eventuale në procesin e dialogut. Kështu kanë thënë për Klan Kosova zyrtarë të Departamentit Amerikan, në prag të njëvjetorit të Marrëveshjes së Washingtonit.
“Për të mbështetur suksesin e dialogut dhe përpjekjet e tjera, ne inkurajojmë të dyja palët që të ruajnë moratoriumet e tyre në çështjet e njohjes që ndërlikojnë përparimin në fushat teknike. Ne po vazhdojmë të punojmë me Kosovën dhe Serbinë për të zbatuar angazhimet e tyre në mbështetje të qëllimit të normalizimit të gjithanshëm të marrëdhënieve. Shtetet e Bashkuara janë të gatshme të mbështesin punën drejt një marrëveshjeje gjithëpërfshirëse dhe detyruese të normalizimit midis Kosovës dhe Serbisë, e përqendruar në njohjen reciproke, e cila hedh themelet për bashkëpunim dhe prosperitet të qëndrueshëm”, thuhet në përgjigjjen e zëdhënësit në DASH Ned Price.
SHBA-ja ka ofruar mbështetjen për dialogun e lehtësuar nga Bashkimi Evropian, duke u bërë thirrje Kosovës dhe Serbisë të angazhohen sërish në këtë proces. Po ashtu, është kërkuar të respektohen me mirëbesim angazhimet që kanë arritur në Washington vitin e kaluar.
Kryeministri aktual Albin Kurti krejt kohën ka shprehur dyshime për ujdinë e arritur në Zyrën Ovale më 4 Shtator 2020. Sipas Kurtit, pika më e vlefshme e atij dokumenti është ajo për njohje të ndërsjellë Kosovë Izrael që ndodhi më 1 shkurt të këtij viti.
Marrëveshjen e Uashingtonit para një viti e firmosën në dokumente të ndara për Kosovën kryeministri Avdullah Hoti e për Serbinë presidenti Aleksandar Vuçiq.
Presidenti i atëhershëm amerikan Donald Trump ishte ndërmjetësues.
