Udhëheqësi i Koresë së Veriut Kim Jong Un urdhëroi zyrtarët të zhvillojnë një fushatë më të ashpër parandalimi të pandemisë në “stilin tonë” pasi ai hodhi poshtë vaksinat e huaja COVID-19 të ofruara përmes programit të imunizimit të mbështetur nga OKB.
Gjatë një takimi të Byrosë Politike të enjten, Kim tha se zyrtarët duhet “të kenë parasysh se shtrëngimi i parandalimit të epidemisë është detyra me rëndësi parësore e cila nuk duhet të lirohet as edhe një moment,” njoftoi të premten Agjencia Qendrore Koreane e Lajmeve.
Ndërsa theksoi nevojën për mjete materiale dhe teknike për parandalimin e viruseve dhe rritjen e kualifikimeve të punonjësve shëndetësorë, Kim gjithashtu bëri thirrje për “rrumbullakim të mëtejshëm të stilit tonë të sistemit të parandalimit të epidemisë”, tha KCNA.
Kim më parë u bëri thirrje koreano-veriorëve që të përgatiten për kufizimet e zgjatura të COVID-19, duke treguar se kufijtë e kombit do të qëndrojnë të mbyllur pavarësisht përkeqësimit të kushteve ekonomike dhe ushqimore, raporton AP, transmeton Klankosova.tv.
Që nga fillimi i pandemisë, Koreja e Veriut ka përdorur karantina të ashpra dhe mbyllje kufijsh për të parandaluar shpërthimet, megjithëse pretendimi për të qenë plotësisht pa viruse dyshohet në masë të gjerë.