Gjenerali i lartë amerikan i ka përshkruar talibanët si një grup të pamëshirshëm dhe tha se s’dihet nëse ata do të ndryshojnë.
Gen Mark Milley tha se është e mundshme që SHBA të bashkëpunojë me ta në operacionet e ardhshme kundër terrorizmit, njofton Klan Kosova.
Forcat amerikane u tërhoqën nga Afganistani të martën, duke i dhënë fund luftës më të gjatë të Amerikës, 20 vjet pasi nisi pushtimin për të rrëzuar talibanët.
Gjenerali Milley ishte duke folur bashkë me sekretarin e Mbrojtjes Lloyd Austin, në paraqitjen e tyre të parë publike që kur trupat e fundit u larguan nga Afganistani.
Presidenti amerikan Joe Biden mori shumë kritika për tërheqjen e papritur të ushtrisë amerikane në Afganistan, e cila çoi në kolapsin e papritur të forcave të sigurisë afgane që ushtria amerikane i kishte trajnuar dhe financuar për vite me radhë.
