Ambasadori i BE-së në Kosovë, Tomas Szunyog, ka thënë se deputetët e Parlamentit Evropian dhe të Parlamentit të Kosovës duhet të vazhdojnë të ndërtojnë besimin me shtetet anëtare të BE-së në mënyrë që vendit t’i liberalizohen vizat.
Ai këto deklarata i bëri përgjatë takimit të shtatë të Komisionit Parlamentar për Stabilizim-Asocim, pasi unioni europian u kritikua nga vartësit institucional për zvarritje të procesit të liberalizimit të vizave.
“Ne jemi të vetdijshëm për rëndësinë që ka liberalizimi i vizave për qytetarët e Kosovës. Raporti i Komisionit Evropian dhe Presidentja e KE-së, von Der Leyen janë shumë të qartë në këtë pikë, Komisioni qëndron prapa rekomandimit të vitit 2018 se Kosova ka përmbushur të gjitha kriteret për liberalizimin e vizave. Unë llogaris në përkrahjen e të gjithë deputetëve të Parlamentit Evropian dhe deputetëve të Kuvendit të Kosovës të vazhdojnë të ndërtojnë besim me shtetet anëtare të BE-së që më në fund të arrihet ky qëllim”, deklaroi Szunyog në Kuvend.
Tutje, ai ia përmendi qeverisë çështjen e numrave në Kuvend si mundësi për vazhdimin drejt reformave evropiane.
“Kam nderin të ju drejtohem këtu në Kuvend në emër të Përfaqësuesit të Lartë të BE-së, Josep Borell në takimin e shtatë për MSA-në. Ky takim është mbledhur sërish pas dy viteve. Qeveria gëzon shumicë të konsiderueshme, dhe i inkurajoj që të vazhdojë punën në reformat evropiane”, tha ai.
Kryeministri Albin Kurti në këtë takim e quajti të padrejtë vendimin për mosliberalizim të vizave për qytetarët e Kosovës.
“Edhe zëri i qytetarëve të Kosovës duhet të dëgjohet nga ju. Veprimi për mosliberalizim të vizave për qytetarët e Kosovës është i padrejtë dhe dritëshkurtër”, deklaroi ai.
