Sindikata e Bashkuar e Arsimit, Shkencës dhe Kulturës, këtë të enjte ka zhvilluar një takim me ministren e Arsimit, Arbërie Nagavci, lidhur me Ligjin e pagave.
Gjatë takimit, përfaqësuesit e SBASHK-ut kanë informuar Nagavcin lidhur me shqetësimet dhe kërkesat aktuale, duke u ndalur tek Ligji i pagave, ku kërkuan nga qeveria për përmirësimin e lëshimeve dhe sa më shpejt këtë Ligj për ta procedojnë në Parlamentin e Kosovës.
“Kryetari i SBASHK-ut Rrahman Jasharaj dhe koordinatori për organizim të brendshëm Ymer Ymeri e kanë ritheksuar se presin takime dhe dialog me Ministrin Hekuran Murati dhe me Kryeministrin Kurti në mënyrë që çështjet të debatohen e zgjidhen me dialog me qëllim që të mos ketë arsye për veprime sindikale”, thuhet në komunikatën e SBASHK-ut, transmeton Klankosova.tv.
Tutje, përfaqësuesit e SBASHK-ut thanë se komunikimi mes tyre dhe MASHT-it në shërbim të arsimit është shembull i mirë, duke kërkuar një gjë të tillë të bëhet edhe nga ministri i Financave, Hekuran Murati, por edhe nga qeveria në tërësi.
“Ata po ashtu i kanë deklaruar Ministres Nagavci se kanë përshëndetur vendimin e Qeverisë për të mbështetur pensionistët, por kanë kërkuar që Qeveria të ndaj një mbështetje buxhetore, se paku edhe për punëtorët tekniko –ndihmës dhe për të punësuarit tjerë që kanë paga të ulëta me qëllim që ata më lehtë të përballojnë ngritjen e vazhdueshme të çmimeve”.
Ndërsa, Nagavci është përgjigjur se do t’i analizoj me kujdes të gjitha kërkesat dhe se do të angazhohet për të krijuar mundësi për takime e dialog të mirëfilltë mes SBASHK-ut, Hekuran Muratit e Qeverisë së Kosovës në tërësi.
