Kryetari i AAK-së Ramush Haradinaj i është drejtuar qytetarëve të Prizrenit duke kërkuar votën për kandidatin e tyre Lulzim Kabashi.
Ai ka thënë se Prizreni është qyteti i njerëzve të zotë dhe të zgjuar që kanë lënë shenjë në historinë e vendit dhe jo vetëm atë kombëtare. por edhe më gjerë.
“Për 17 tetor për zgjedhjet komunale e kam për nder të kërkoj besimin tuaj për ofertën e Aleancës, për programin qeverisës dhe për kryetarin tonë”.
Haradinaj, përmes një videomesazhi, tregoi disa nga prioritetet të cilat i ka kandidati për kryetar të komunës së Prizrenit nga AAK-ja në program qeverisës.
“Kryetari ynë Lulzim Kabashi është një njeri i zoti, njeri që gjatë gjithë jetës së tij iu kushtua vlerave në të cilat beson Prizreni dhe Kosova, ka përgatitur një program të mirë qeverisës që ka për fokusim zhvillimin ekonomik, në fillim avancimin e infrastrukturës, zhvillimin e turizmit, zonat industriale dhe mundësinë për punësim. Është betuar që do të qeverisë me qytetarët e Prizrenit, me transparencë dhe në bazë të ligjit”.
