Në Institutin Albanologjik në Prishtinë është promovuar vepra monografike `Avdyl Hysë Gjonbalaj – Tribun i Plavë e Gucisë” me autor Pleurat Krasniqi. Vepra në fjalë përbëhet gjithsej nga 22 pika, duke përfshirë jetën, heroizmin dhe veprat e të ndjerit Avdyl Hysë Gjonbalaj.
“Monografia kushtuar një veprimtari të përjetshëm të çështjes kombëtare, Avdyl Hysë Gjonbalaj, në të njëjtën kohë është edhe një rrëfim sipas gojëdhënës në njërën anë dhe sipas burimeve historike në anën tjetër që flasin me historinë në këto dy rrafshe. Do të thotë duke folur për ngjarjet historike nga është edukuar Avdyl Hysë Gjonbalaj, ai ka mësuar si përjtoheshin, si përballoheshin dhe si
tejkaloheshin ngjarjet historike, nëpër të cilat e kishte përplasur historia popullin shqiptar”, tha për RTK-në, Emin Kabashi, redaktor i veprës.
Ndërkaq, prof.dr. Nuredin Ahmeti tha se në mesin e shumë ngjarjeve e personaliteteve të historisë shqiptare për të cilat ka pak informacione të shkruara por që janë plotësuar nga kujtesa popullore, është edhe figura e Avdyl Hysë Gjonabalajt, i cili tani është përjetësuar edhe në mes të dy kopertinave që u promova sot.
“Një ninull djepi, uratë jete në këndimin e fillimjetës së personazhit për të cilin flasim sot përmes kësaj monografie, është dëshmi e këndimit shekullor të nënave tona përplot qëndresë, besnikëri, bujari e rezistencë stinëve ndërvite që të ruhet djepi, sofra dhe oxhaku në vatrat e etnisë sonë. Një jetëshkrim, që e deshi vendi, kuvendi, përballje betejash gjatë jetës për jetën e njeriut. Ky ishte dhe mbetet i tillë përjetësisht, kujtesë ndër data sa historie aq edhe kombëtarie”, tha Rrustem Gërguri, shkrimtar.
Në fund, autori i kësaj monografie, Pleurat Krasniqi, tha se në një libër me 100 faqe nuk mund të përfshihet jeta e bujshme 100-vjeçare për veprën heroike dhe sakrificën e Avdyl Hysë Gjonbalajt.
