Pas raundit të fundit të bisedimeve teknike në Bruksel midis Kosovës dhe Serbisë, drejtori i të ashtuquajturës Zyra për Kosovë në Qeverinë e Serbisë, Petar Petkoviq, ka bërë një deklaratë që ka të bëjë me “hapjen e arkivave të UÇK-së”.
Një deklaratë e tij pason atë të zëvendëskryeministrit të Kosovës, Besnik Bislimit, i cili kishte bërë të ditur se gjatë takimit të nivelit të ekspertëve në Bruksel, se pala serbe është pajtuar në parim për hapjen e arkivave shtetërore për çështjen e të pagjeturve, por se Serbia kërkon edhe hapjen e arkivave të UÇK-së.
“Ne kemi evidentuar se problemi kryesor për çështjen e të zhdukurve me forcë është mos gatishmëria e palës serbe për hapjen e arkivave shtetërore. Ne kemi diskutuar edhe për kthimin e disa mbetjeve mortore të viktimave që janë gjetur në Kishevak. Po ashtu ne kemi kërkuar mos pjesëmarrjen e (Velko) Odalloviqit në delegacionin serb. Pala serbe në mënyrë deklarative kanë thënë se janë dakord të hapin gjitha arkivat, përfshirë edhe arkivat në Kosovë dhe të UÇK-së”, kishte thënë Bislimi.
Siç ka pretenduar Petkoviq “pala e Prishtinës ka treguar papërgatitje absolute për dialog dhe negociata mbi problemet kryesore në zbatimin dhe shkeljen e marrëveshjeve të arritura deri më tani”.
Sidoqoftë, ai ka deklaruar se “ajo që është e rëndësishme është se është arritur përparim në çështjen e personave të zhdukur dhe se Prishtina më në fund ka njohur ekzistencën e arkivave të UÇK-së dhe ka rënë dakord t’i hapë ato”, shkruajnë mediat serbe, përcjell Telegrafi.
Ndryshe, rreth kësaj teme është deklaruar edhe kryetari i delegacionit të Kosovës për bisedime për çështje e personave të zhdukur, Andin Hoti.
Ai ka dhënë detaje rreth vizitës dy ditore në Bruksel të delegacioneve të Kosovës dhe Serbisë, për zbardhjen e fatit të të pagjeturve.
Hoti përmes një statusi në Facebook, ka thënë se e kanë ftuar Miroslav Lajçak për qasje të plotë në arkivat shtetërore të Kosovës, me qëllim që të heqin çfarëdo dyshimi që mund të kenë sa i përket “shpikjes së tyre për arkivat e UÇK-së”.
“Arkivat e Kosovës kanë qenë dhe janë të hapura, prandaj marrëveshja është në interesin tonë sepse vetëm na mundëson qasje në arkivat ushtarake të Serbisë, e që është barriera kryesore për zbardhjen e fatit të më të dashurve tanë”, ka shkruar ndër të tjerash Hoti.
Hoti po ashtu thotë se kanë kërkuar qasje të plotë në territorin e Serbisë për hulumtime të varrezave masive apo çfarëdo informate që ka për zbardhjen e fatit të personave të zhdukur.
Ndërkohë, për çështjen e hapjes së arkivave, ka pasur reagime nga opozita, por edhe nga Organizatat e Veteranëve të Luftës.
