Presidentja e Kosovës, Vjosa Osmani ka takuar zëvendës ndihmës sekretaren në Byronë për Çështje Evropiane dhe Euro-Aziatike të Departamentit të Shtetit të SHBA, Molly Montgomery me të cilën ndër të tjera diskutuan edhe për çështjen e qytetarëve afganë me qëndrim të përkohshëm në Kosovë si dhe për marrëdhëniet Kosovë-SHBA
Gjatë takimit, Presidentja falënderoi zëvendës ndihmës sekretaren për kontributin e vazhdueshëm dhe shumë të çmuar të qeverisë së Shteteve të Bashkuara dhënë Kosovës dhe rajonit, si dhe shprehu dëshirën e madhe për të rritur nivelin e angazhimin në një sërë çështjesh nga siguria deri tek diplomacia, përcjell Klankosova.tv.
Osmani përsëriti edhe një herë se Kosova do të vazhdojë të qëndrojë pranë aleatit tonë më të madh dhe më të besueshëm dhe se vendimi për afganët ishte vetëm një dëshmi e përkushtimit tonë në këtë marrëdhënie.
Gjithashtu edhe Montgomery falënderoi Presidenten për angazhimin e saj personal për të mundësuar ardhjen e afganëve dhe shprehu mirënjohjen e Shteteve të Bashkuara për institucionet e Kosovës dhe popullin e saj që i kanë bërë të ndihen të mirëpritur.
