Presidentja Vjosa Osmani, gjatë vizitës në Gjermani ka takuar bizneset gjermane, akademikë, hulumtues, përfaqësues të shoqërisë civile dhe media, përcjell KosovaPost.
Përmes një statusi në Facebook, Osmani ka thënë se bizneset gjermane i ka siguruar se Kosova është e gatshme të jetë adresa e radhës e investimeve të tyre.
Postimi i plotë:
Takimet me bizneset gjermane, akademikë, hulumtues, përfaqësues të shoqërisë civile e media ishin pjesë e rëndësishme e vizitës sime zyrtare në Gjermani.
Vizita nuk mund të përmbyllej pa një bashkëbisedim me bizneset gjermane, nisur nga fakti se Gjermania është investitori kryesor në vendin tonë dhe shkëmbimet tregtare ndërmjet vendeve tona po përjetojnë një hov të ndjeshëm. Pata kënaqësinë që së bashku me anëtarët e Shoqatës Gjermane të Bizneseve Lindore, Oda Ekonomike të shumta, përfaqësues të bizneseve e përfaqësues të Ministrisë së Ekonomisë e Energjisë, të flas për mundësitë për investime në fushën e IT-së, digjitalizimit, industrisë, energjisë dhe shëndetësisë. I sigurova ata se Kosova është e gatshme të jetë adresa e radhës e investimeve të tyre.
Po ashtu, kisha kënaqësinë që në bashkëbisedim me ambasadorin Wolfgang Ischinger, në kuadër të një diskutimi të organizuar nga Këshilli Gjerman për Marrëdhënie me Jashtë, të flasim për sfidat e deritashme të Republikës së Kosovës, për zhvillimet aktuale dhe mundësitë që i kemi përpara.
Për shtetndërtimin dhe konsolidimin e subjektivitetit ndërkombëtar të Republikës sonë fola edhe me akademikë e hulumtues në Universitetin Humboldt. Pas vizitës së ekspozitës “Standing for liberty”, e cila në fokus kishte historitë e akademikëve e skencëtarëve të persekutuar nga mbarë bota, fola edhe për rëndësinë që ka pas arsimimi në rezistencën e Kosovës ndaj terrorit dhe represionit të regjimit gjenocidal të Serbisë.
