I ftuar në hapësirën Intervista e Ditës në SYRI TV me moderatoren Armela Ferko, kreu i Këshillit Kombëtar në Mal të Zi, Faik Nika ka hedhur dritë mbi protesta e dhunshme dhe atë çfarë po ndodh në shtetin fqinj.
Nika: Situata sot është më e qetë. Dy ditë më parë ishte më e tensionuar, sot duket disi më e qetë. Nuk kemi më njerëz në rrugë dhe protesta të dhunshme por debatet do vazhdojnë gjatë.
Unë e konsideroj përplasje mes dy grupeve, atyre që janë pro Malit të Zi dhe pavarësisë së tij dhe grupi që e konsideron identitetin malazez diçka të stisur dhe jo të vërtetë dhe e konsiderojnë se Serbia duhet të jetë udhëheqëse dhe dirigjuese e Malit të Zi. Këtu kemi një përplasje e nisur nën petkun e fesë por në thelb është një përplasje reale politike mes atyre që janë pro Malit të Zi dhe atyre që më herët kanë votuar kundër Malit të Zi dhe bashkimit me Serbinë, janë të njëjtin aktorë.
Ferko: BE është shqetësuar gjatë ditës së sotme për ngjarjet në Cetinjë, duke u ndalur në lirinë e tubimit duke e cilësuar një të drejtë themelore të BE. Ka pasur një shkelje të lirisë së tubimit, nisur nga aksioni i policisë?
Nika: Padyshim, ka pasur një përpjekje të qeverisë aktuale të krijojë kushtet dhe mundësitë që të bëhet ceremonia e shugurimit të kreut të Kishës Ortodokse Serbe në Cetinjë, kurse grupi i cili e konsideron pavarësinë e Malit të Zi dhe tenton të bëjë edhe pavarësimin e Kishës Ortodokse malazeze, e kundërshtojnë zhvillimin e ceremonisë në kishën e Cetinjës, mund ta bëjnë në një prej kishave të tjera në Mal të Zi, pasi malazezët e konsiderojnë si kryeqytetin shpirtëror dhe historik të tyre.
Këtu ka lindur zanafilla e konfliktit, ku këto dy ditë kanë nisur edhe përleshjet dhe dhuna nga grupi malazez që e konsideron si përzierje në punët e brendshme të Malit të Zi, të dirigjuar përmes Kishës Ortodokse serbe, e cila ende dirigjohet nga politika e Beogradit. Mesa duket nga veprimet, në Serbi ende nuk kemi një shkëputje të shtetit nga kisha dhe kjo është për të ardhur keq.
