Nesër përfundon moratoriumi nga marrëveshja e 4 shtatorit që Kosova të mos aplikojë për anëtarësim në organizata ndërkombëtare.
Zyrtarë në Departamentin e Shtetit Amerikan i kanë bërë thirrje dhe kanë inkurajuar të dyja palët Kosovën dhe Serbinë që t’i vazhdojnë moratoriumet e tyre në çështjen e njohjes që ndërlikojnë përparimin në fushat teknike.
Analisti Drilon Gashi ka thënë që këshillat nga SHBA-të janë ato më të rëndësishmet nga të gjithë partnerët e Kosovës.
“Këshillat nga SHBA-të janë ato më të rëndësishmet nga të gjithë partnerët e Kosovës – është aleati më strategjik. Por, meqë me sot moratoriumi i nënshkruar me marrëveshjen e një viti më parë ka skaduar, unë nuk mendoj që nga ana e Kosovës duhet të respektojë më tutje këtë moratorium dhe si rrjedhojë të mos aplikojë në anëtarësimet në organizata ndërkombëtare për shkak se në fakt kur është nënshkruar kjo vjet për fat të keq është bërë një lloj barazie që nuk do të duhej të bëhej në mes të fushatës për cnjohje nga ana e Serbisë dhe ajo me aplikime për organizata ndërkombëtare nga ana e Kosovës”.
Gashi në Info Magazine në Klan Kosova ka thënë që Kosova ka të drejtë pas 4 shtatorit të aplikojë në organizata ndërkombëtare.
“Po, mund të bëjë këtë pasi nuk do të ishte veprim që bie ndesh me marrëveshjen. Kjo ka qenë e paraparë për një periudhë njëvjecare. Këshilla e SHBA-ve ishte që të vazhdohej me moratoriumin por Kosova mund ta vlerësojë nëse është në interesin e saj kjo gjë. Unë nuk mendoj që është në interesin e Kosovës që të vazhdohet ky moratorium për mosaplikim dhe moskërkim të njohjes, por komunikimi që duhet të ndodhë me SHBA-në për ta shpjeguar pse kjo është një pikë që Kosova ka një mendim ndryshe dhe do të vazhdojë me një qasje ndryshe dhe kërkon shumë që SHBA-të të vazhdojnë të jenë përkrahës të atij procesi”, u shpreh Gashi.
