NASA së shpejti do ta nisë një anije kozmike që duhet ta godasë qëllimisht një asteroid.
Misioni DART do të ngrihet më 23 nëntor me një raketë SpaceX Falcon 9 nga baza hapësinore Vandenberg në Kaliforni. Pas nisjes në nëntor, NASA do ta testojë teknologjinë e devijimit të trajektores së asteroidit në shtator 2022 për të parë nëse mund të ndikojë në trupat qiellorë që kalojnë pranë Tokës.
Ekspertët synojnë të përpiqen ta devijojnë orbitën e Dimorphos, një satelit që orbiton asteroidin Didimos. Kjo duhet të jetë demonstrimi i parë i vërtetë i këtij lloji të teknologjisë në emër të mbrojtjes së planetit, shkruan CNN .
Objektet pranë Tokës (NEO), të tilla si asteroidët ose kometat, shpesh fluturojnë relativisht afër planetit tonë. NEO është çdo objekt që kalon pranë Diellit në një distancë prej më pak se 1.3 AU (AU, njësi astronomike). AU tregon distancën e përafërt të Tokës nga ylli ynë dhe është 150 milionë kilometra. Kjo do të thotë se këto janë trupa që do të kalojnë pranë planetit tonë në një kuptim relativ. Për shembull, disa asteroidë të kategorisë NEO mund të kalojnë brenda një distance prej 6.3 milionë kilometrash nga planeti ynë, që në fakt është mjaft larg. Për krahasim, Hëna është mesatarisht 384,400 kilometra larg nesh.
Një objekt potencialisht i rrezikshëm (PHO) është një objekt hapësinor, diametri i të cilit është më i madh se 140 metra.
