Ministria e Arsimit, Shkencës, Teknologjisë dhe Inovacionit (MAShTI), ka ndarë 200 mijë euro për institucionalizimin e Qendrave Mësimore, por komunat e vendit nuk kanë mundësi të aplikojnë për përfitimin e këtyre mjeteve.
Kështu bëri të ditur zëvendësministri i Arsimit, Dukagjin Popovci, në konferencën e sotme “Qendra mësimore dhe problematike e institucionalizimit”, e organizuar nga organizatat e konsorciumit “Zëri i Romëve, Ashkalinjve dhe Egjiptianëve”, “HEKS EPER” dhe “Terre des hommes”.
Arsyeja e kësaj “barriere”, sipas tij, është fakti se këto mjete janë dedikuar për personat juridikë dhe organizatat e shoqërisë civile.
“Pupovci deklaroi se MAShTI ka ndarë 200.000 euro për Qendrat Mësimore dhe se vitin e ardhshëm planifikohet që kjo shumë të dyfishohet, mirëpo, përkundër procesit të institucionalizimit, komunat të cilat menaxhojnë Qendrat Mësimore nuk do të mund të aplikojnë për këto mjete pasi që u dedikohen personave juridikë dhe organizatave të shoqërisë civile të cilat punojnë për dhe me Qendrat Mësimore”, citohet të ketë thënë ai.
Mirëpo, ai ka premtuar se Ministria e Arsimit do të punojë në gjetjen e një zgjidhjeje adekuate rreth mundësive ligjore sa i përket institucionalizimit të Qendrave.
Ndërkaq, zëvendëskryeministrja Emilija Rexhepi, tha se ekziston një vullnet i fortë politik për të mbështetur arsimin për romët, ashkalitë dhe egjiptianët dhe se Zyra e Kryeministrit do të mbështesë iniciativat për Qendrat Mësimore për të gjetur një zgjidhje adekuate afatgjatë.
Mbështetje për arsimimin e këtyre komuniteteve ka premtuar edhe kryetari i Komisionit Parlamentar për Arsim, Ardian Gola, i cili është zotuar se do të mbështes dhe do të shtyjë përpara të gjitha çështjet që lidhen me arsimimin e pjesëtarëve të tre komuniteteve në fjalë.
