Kryeministri Albin Kurti dhe ambasadori i Shteteve të Bashkuara të Amerikës Philip Kosnett kanë zhvilluar sot takimin lamtumirës, me rastin e përfundimit të mandatit të këtij të fundit.
Kurti e falënderoi ambasadorin amerikan për bashkëpunimin përgjatë gjithë mandatit të tij në Kosovë.
“Shtetet e Bashkuara të Amerikës janë aleati dhe partneri ynë i pazëvendësueshëm. Me të përkrah dhe me vullnetin politik të Qeverisë, Kosova do të bëhet gjithmonë e më shumë partner i qëndrueshëm i Shteteve të Bashkuara të Amerikës dhe shtet i së drejtës dhe zhvillimit”.
Ai tha se ai si kryeministër dhe qeveria që udhëheq do të vazhdojë këtë traditë të bashkëpunimit të ngushtë dhe të veçantë me Shtetet e Bashkuara të Amerikës dhe përfaqësuesit e saj në Kosovë në përmbushjen e synimeve dhe interesave të përbashkëta.
Kurti i uroi ambasadorit Kosnett suksese të mëtutjeshme në angazhimet e tij të radhës, duke ia rikujtuar se gjithmonë është i mirëseardhur në Kosovë.
