Në mbledhjen e Qeverisë së Kosovës, në vazhdën e projektligjeve të ndryshme që janë proceduar, është ndryshuar edhe një rregullore. Rregullorja që rregullon punën dhe stafin e ministrave, që quhet “Projekt-rregullore për ndryshimin dhe plotësimin e Rregullores për Fushat Administrative të Zyrës së Kryeministrit dhe Ministrive”
Kryeministri Albin Kurti ka prezantuar ndryshimin e rregullores që mundëson shtimin e këshilltarëve politikë.
“Në rastet kur janë fuzionuar dy apo më shumë ministri, atëherë ministri mund të ketë deri 10 këshilltarë të brendshëm politikë”, ka thënë Kurti, duke potencuar edhe pesë këshilltarë të jashtëm.
Gjithë këtë ndryshim, ai e ka arsyetuar me zotimin e tyre zgjedhor për rritje efikasiteti.
“Siç jemi zotuar në programin qeverisës për të përmirësuar mënyrën e punës, organizimit dhe funskioniimt të qeverisë, po e përditësojmë edhe kornizën ligjore. Si rezultat i fuzionimit të ministrive, është rritur fushëveprimi dhe janë rritur përgjegjësitë e tyre, prandaj me qëllim të ngritjes së kapaciteteve dhe efikasitetit në qeverisje”, ka thënë Kurti në mbledhjen e Qeverisë së Kosovës.
Në bazë të rregullores, këshilltarët e brendshëm politikë paguhen me pagë shteti, teksa këshilltarët e jashtëm nuk paguhen, mirëpo kanë privilegjet e këshilltarëve të brendshëm, si: mbushje telefonike dhe reprezentacione.
Kjo rregullore është votuar dhe ka kaluar tutje.
