Ministri i Shëndetësisë, Arben Vitia, ka njoftuar se kanë refuzuar disa donacione të vaksinave AstraZenenca nga disa shtete europiane meqë kishin pak afat përdorimi dhe ekzistonte rreziku që të mund të mos u jepeshin qytetarëve siç ka ndodhur me donacionin e Norvegjisë.
“Janë refuzuar disa donacione të vaksinës AstraZeneca me të vetmen arsye sepse Komiteti për Vaksinim që gjendet në MSH dhe është një trupë profesionale dhe rekomandimet i marrim parasysh. Kanë qenë oferta për donacione, pas asaj që i kemi marrë nga Norvegjia, që kanë pasë një afat skadimi optimal që do të na kishte garantuar se do t’i administrojmë te qytetarët tonë. Me rekomandim të Komitetit me mirësjellje i kemi falënderuar dhe refuzuar sepse ka pasë rrezik që edhe ato të mos mund t’i administrojmë “, ka thënë Vitia në një konferencë për media.
Derisa fajin për mospërdorimin e 133 mijë të dozave të vaksinës AstraZeneca ia la teorive konspirative që qarkulluan për këtë lloj të vaksinës dhe deklaratave, siç tha, të papërgjegjshme për afatin e skadimit të tyre.
“Kur kemi filluar vaksinimin me këtë vaksinë, nga 14-15 mijë qytetarë të interesuar numri ka rënë në 5-6 mijë. Një pjesë e tyre s’kanë dashur të vaksinohen me AstraZeneca edhe ata që kanë bërë terminë. E kemi sqaruar edhe publikisht dhe e këtë e ka bërë edhe ambasada norvegjeze”.
Vetëm një muaj më parë, Ministria e Shëndetësisë nuk ka pranuar donacione të vaksinave nga Polonia dhe Bullgaria. Duket se Qeveria Kurti, në gjysmën e korrikut, nuk e ka menduar se sezoni do të ketë këtë epilog. Tash janë regjistruar deri në 36 viktima në ditë, e janë të vaksinuar rreth 15 për qind e popullësisë me dy dozat.
Express ka siguruar korrespondencat me zyrtarë të MSH-së, në të cilat dëshmohet refuzimi i vaksinave në korrik. MSH-ja ka sqaruar pjesërisht pse nuk u pranuar këto donacione.Kosova ka arritur bilanc lufte me numrin e viktimave nga Covid-19. Situata u përkeqësua si kurrë më parë në ditët e fundit të këtij gushti. Vaksinimi, ndërkaq, është akoma te rreth 15 për qindshi i popullësisë me të dy dozat dhe te 30 për qindëshi me nga një dozë.Një muaj më parë, në korrik, duket se nuk është lexuar mirë situata që pritej të krijohej, pas shfaqjes së variantit “Delta” të virusit SARS-CoV-2.
Në korrik, Ministria e Shëndetësisë e udhëhequr nga Arben Vitia, nuk e ka pranuar një donacion me vaksina, të ofruar nga Polonia dhe nga Bullgaria.Zyrtarët e Ministrisë së Shëndetësisë kishin vlerësuar se muaji korrik kur ishte bërë oferta për këto donacione, s’ishte kohë e përshtatshme. Saktësisht më 15 korrik, i Ngarkuari me Punë i Republikës së Kosovës në Pragë, Arbër Vllahiu, kishte dërguar një e-mail në adresë të zyrtarëve të Ministrisë së Shëndetësisë, ku i kishte njoftuar se po pret një përgjigje për një donacion me vaksina Astra Zeneca nga shteti i Polonisë.
