Është inauguruar sot Spitali për Fëmijë në Qendrën Klinike Universitare të Kosovës, i cili është donacion i Emirateve të Bashkuara Arabe.
Në ceremoni morën pjesë presidentja e vendit, Vjosa Osmani, kryeministri Albin Kurti dhe ministri i Shëndetësisë, Arben Vitia. Të pranishëm janë parë edhe ish-presidentët Atifete Jahjaga dhe Behgjet Pacolli, si dhe zyrtarë të Emirateve.
Presidentja e vendit Vjosa Osmani, është shprehur mirënjohëse ndaj Emirateve të Bashkuara Arabe, duke thënë se ky spital, është fryti i një punë disavjeçare.
”Urojmë që ky spital të jetë investimi i parë në vazhdën e investimeve të shumta që vijnë. Faleminderit nga zemra për të gjithë aleatët tanë në Emiratet e Bashkuara. Ne u jemi mirënjohës e falënderues, por mirënjohjet i gëzoni që në ditën e parë kur ju u rreshtuan pranë vendeve kur na njohët si shtet të lirë e të pavarur dhe kur 8 vite më pas i dhuruat spitalin pediatrik. Në atë vit ju vendosët që tu jepni krah Kosovës, duke ndikuar që shumë familje e të vegjlit tanë të mund të mjekohen e shërohen në modelet me të larta. Në një kapacitet prej 100 shtretërve Kosova ka një adresë për trajtim të fëmijëve tanë. Ky është fryti i një pune disa vjeçare që do të mbetet simbol i miqësisë sonë që uroj të lulëzoj çdo herë e më shumë”, tha Osmani.
Ndërsa, kryeministri i Kurti, ka falënderuar Emiratet e Bashkuara Arabe, sipas tij për kontributin e çmuar ndaj shtetit të Kosovës.
Kurti u shpreh se përveç investimit në infrastrukturën shëndetësore, ky projekt është investim direkt edhe në shëndetin e fëmijëve në Kosovë.
”U jemi mirënjohës Emirateve të Bashkuara Arabe. Vend mik që ka dhënë kontribut të çmuar. Përveçse investim në infrastrukturën shëndetësore, ky projekt është investim edhe në shëndetin e fëmijëve. Fëmijët janë qytetarët e ardhshëm të demokracisë tonë. Edhe kur kemi shkruar zotimet, edhe kur jemi në krye të shtetit. Me programin e qeverisë jemi zotuar se do të angazhohemi. Ky spital do të kontribuojë në fillimin e mirëqenies së fëmijëve të Kosovës. Në emër të Qeverisë dhe popullit të Republikës së Kosovës dhe emrin tim personal shpreh falënderim për Emiratet e Bashkuara Arabe”, theksoi Kurti.
