Qeveria e Maqedonisë së Veriut ka mbajtur një takim urgjent të enjten për zjarrin që kaploi një spital fushor të ngritur për të trajtuar pacientët me COVID-19, që la 14 persona të vdekur.
Zjarri shpërtheu të mërkurën vonë në qytetin perëndimor të Tetovës, ku spitali ishte ngritur pas një rritje të fundit të infeksioneve në rajon që la spitalet lokale të mbushura plot.
Zyra e prokurorit kryesor në Shkup, tha se 14 persona kishin vdekur si pasojë e zjarrit. Midis tyre nuk kishte personel mjekësor.
Kryetarja e Tetovës Teuta Arifi shpalli tre ditë zie për viktimat, raporton AP, transmeton Klankosova.tv.
Zyra e prokurorit urdhëroi ekspertët e mjekësisë ligjore të identifikojnë eshtrat, me procesin që pritet të zgjasë më shumë se zakonisht për shkak të protokolleve të veçanta të kërkuara sepse viktimat ishin pacientë me COVID-19.
Pesë prokurorë, nga Tetova dhe Shkupi, janë duke punuar në hetimin për shkaqet e zjarrit. Kryeministri Zoran Zaev tha në një postim në Facebook se zjarri pasoi një shpërthim në vend.
Nuk ishte e qartë se çfarë e shkaktoi shpërthimin, por kishte spekulime se ai ishte i lidhur me furnizimin me oksigjen.
Zyrtarët e Ministrisë së Shëndetësisë thanë se trupat e atyre që vdiqën u transferuan në spitalet në kryeqytetin Shkup, rreth 45 kilometra (30 milje) në lindje.
