Kandidati i LDK-së për kryetar të Gjilanit, Lutfi Haziri, i është bashkuar thirrjes së Qeverisë së Kosovës për zbardhjen e vdekjes së Astrit Deharit.
Haziri ka kërkuar që përveç thirrjes për zbardhjen e vdekjes së Astrit Deharit, të zbardhet edhe rasti i vdekjes së Agon Musliut.
“Kryeministri i Republikës, Qeveria dhe Kosova po e kërkojnë zbardhjen e vdekjes së Astrit Deharit. Ne i bashkangjitemi thirrjes dhe përveç zbardhjes së rastit për Astritin, kërkojmë që të zbardhet edhe rasti i vdekjes së Agon Musliut. Drejtësi edhe për Agonin, i cili në objektin qeveritar, i ndaluar për karantinë, e humbi jetën, duke na tronditur të gjithëve!”, ka shkruar Haziri në rrjetin social ‘Facebook’.
Kujtojmë se Astrit Dehari është gjetur i vdekur në qelinë e tij në burgun e Prizrenit me datën 5 nëntor të vitit 2016, ndërsa Agon Musliu u vetëvra në Qendrën e Studentëve në Prishtinë, gjatë kohës sa ishte i karantinuar.
