Sot, me fillim nga ora 07:00, ka nisur heshtja zgjedhore për balotazhin e 14 nëntorit.
Në raundin e parë të këtyre zgjedhjeve që u mbajtën më 17 tetor u zgjodhën 17 kryetarë komunash, ndërsa në 21 komuna të tjera qytetarët do të votojnë sërish për të zgjedhur kryetarin.
Sikur në rundin e parë, edhe në pesë ditët e fushatës në këtë raund të dytë u vërejt një fushatë më ndryshe sesa në zgjedhjet e tjera për shkak të pandemisë COVID-19.
Fushata për garën e balotazhit ka zgjatur pesë ditë, nga e hëna e 8 nëntorit deri të premten e 12 nëntorit.
Nga 38 komuna, qytetarët e 21 prej tyre do t’u drejtohen sërish kutive të votimit për të zgjedhur kryetarin e komunës, në mes dy kandidatëve më të votuar në raundin e parë.
Partia që garon në numrin më të madh të komunave për balotazh është Lëvizja Vetëvendosje me gjithsej 12 komuna.
Lidhja Demokratike e Kosovës garon në 9 komuna, Partia Demokratike e Kosovës në 8, Aleanca për Ardhmërinë e Kosovës në 5.
Kryeqyteti në raundin e parë ka mbetur punë e pazgjidhur, andaj kryeqytetasit ditën e dielë do t’i drejtohen kutive të votimit.
Në balotazh kanë shkuar edhe komunat e mëdha, si: Prizreni, Gjakova, Gjilani e Podujeva.
