Gjigantët e teknologjisë nuk do të jenë në gjendje të përballojnë presionin nga qeveritë në të gjithë botën për të hyrë në të dhënat e përdoruesve për mbikëqyrje dhe zbatim të ligjit, paralajmëroi këtë të premte ish-kontraktori i Sigurisë i Shteteve të Bashkuara të Amerikës, Edward Snowden.
Snowden vuri në dukje se kompania Apple tashmë kishte zbuluar planet për të skanuar iPhone-të amerikanë për imazhe të abuzimit seksual të fëmijëve, shkruan AP, transmeton Klankosova.tv.
“Nesër mund të jetë diçka tjetër, një kategori e re. Ju nuk e dini se çfarë kërkojnë ata,” tha ai.
Snowden hodhi poshtë sugjerimet se ai mund të fitonte Çmimin Nobel për Paqe, pasi u nominua për çmimin së bashku me themeluesin e WikiLeaks, Julian Assange dhe sinjalizuesin, Chelsea Manning.
“Nuk do të ndodhë kurrë,” tha ai.
Snowden punoi për Agjencinë Kombëtare të Sigurisë Amerikane para se të ikte në Rusi pas rrjedhjes së dokumenteve të klasifikuara në Wikileaks.
