Britania ka përfunduar evakuimet e saj nga Afganistani. Kjo i dha fund 20 viteve të pranisë ushtarake britanike në Afganistan, transmeton KosovaPost.
Ministri britanik i Mbrojtjes Ben Wallace njoftoi në Twitter se fluturimi i fundit në operacionin e evakuimit u zhvillua dje.
Më shumë se 15.000 njerëz u evakuuan në më shumë se 165 fluturime në 14 ditë.
Kryeministri britanik Boris Johnson në lidhje me operacionet e evakuimit tha: “Tani do të përdorim të gjitha mjetet diplomatike dhe humanitare në dispozicion për të ruajtur fitimet e 20 viteve të fundit dhe për t’i dhënë popullit afgan të ardhmen që meriton.”
Ndërkaq ministri i Jashtëm britanik Dominic Raab deklaroi se ekipet po punonin ditë e natë për të evakuuar më shumë se 15.000 njerëz.
“Pas tërheqjes, ne do të vazhdojmë të rivendosim ata (afganët) që kanë të drejtë për zhvendosje përmes vendeve të treta ose, nëse sigurohen, përmes Aeroportit të Kabulit.”
Ambasada Britanike në Kabul do të zhvendoset përkohësisht në Katar derisa të rivendoset një prani diplomatike në Afganistan.
Evakuimet nga Afganistani u regjistruan si evakuimi më i madh ushtarak i Britanisë që nga Lufta e Dytë Botërore.trt
