Të martën pasdite, Presidenti i Shteteve të Bashkuara të Amerikës, Joe Biden u përpoq të “kthente faqen” nga një muaj kaosi dhe vdekjeje në Afganistan dhe më gjerë, nga 20 vjet përpjekje përfundimisht të kota të SHBA-së për pushtim dhe ndërtim kombi.
Ai foli për “suksesin e jashtëzakonshëm” të misionit të evakuimit të SHBA-së gjatë javëve të fundit, me më shumë se njëqind mijë amerikanë dhe afganë që u dërguan me aeroplan nën presionin ekstrem.
Ndonjëherë ai dukej mbrojtës, duke vënë në dukje se amerikanët ishin paralajmëruar 19 herë të dilnin nga Afganistani para tërheqjes së ushtrisë amerikane në gusht. Ai akuzoi udhëheqësit afganë, aleatë nga të cilët SHBA-ja vareshin, për “korrupsion dhe keqpërdorim”. Dhe ai fajësoi administratën Trump për negocimin e asaj që ai e karakterizoi si një marrëveshje tërheqjeje joadekuate me talibanët.
Ai kaloi më pak kohë duke folur për dështimet – nga 13 ushtarët amerikanë që humbën jetën javën e kaluar dhe qindra viktima civile. Në vend të kësaj, ai foli për koston e të ashtuquajturës “luftë përgjithmonë”-mijëra viktima ushtarake amerikane, dhjetëra mijëra plagosje dhe triliona dollarë të shpenzuar në një përpjekje që filloi dhe përfundoi me kontrollin e talibanëve.
Ai tha se SHBA-ja nuk kishte interes jetik për Afganistanin dhe se misioni atje-për të çrrënjosur Al-Kaedën dhe parandalimin e sulmeve të ardhshme terroriste-u përmbush një dekadë më parë.
“Ishte koha për t’i dhënë fund kësaj lufte,” tha ai. Ai më pas u përpoq të riformulojë politikën e jashtme amerikane si më pak të varur nga dislokimet ushtarake dhe më shumë nga diplomacia dhe bashkëpunimi ndërkombëtar për t’u përballur me kundërshtarët si Kina dhe Rusia.
Sondazhet e opinionit publik tregojnë se amerikanët ende mbështesin tërheqjen e SHBA-së nga Afganistani, megjithëse shumë janë të pakënaqur me mënyrën se si Biden mbikëqyri daljen. Zyrtarët e Shtëpisë së Bardhë thonë se shpresojnë, me kalimin e kohës, që kombi të jetë mirënjohës për atë që presidenti arriti dhe të harrojë detajet se si përfundoi.
