Kastriot Këpuska nga Fondi Kosovar për Garanci Kreditore thotë se bankat po hezitojnë ta financojnë sektorin e bujqësisë, sepse kërkon një lloj ekspertize nga ana e bankave që, sipas tij, jo të gjitha e kanë.
Ai në emisionin “7 Ditë me Panxhën” që transmetohet në Klan Kosova shpjegoi se ka një tendencë që financimet të shkojnë në sektorë të tjerë që, sipas tij, nuk gjenerojnë shumë në aspektin e zhvillimit ekonomik.
“Ne fuqimisht e përkrahim këtë sektor së bashku me prodhimtarinë e shumë sektorëve të tjerë për të cilët kemi edhe dritare enkas të zhvilluara, në mënyrë që sa më shumë të jetë fokusi i financave nga ana e bankave të kanalizohet te këta sektorë”.
Ai tutje shpjegoi edhe se si kushdo nga sektori prodhues që ka nevojë për financim të punës, mund të aplikojë në Fondin Kosovar për Garanci Kreditore, njofton Klankosova.tv.
“Principet e fondit janë që ne nuk kemi kontakt direkt me klientin, do të thotë klienti gjithsesi duhet të orientohet te bankat tona të regjistruara dhe aty ti marrë informatat e nevojshme. Ne kemi marrëdhënie kontraktuale përmes marrëveshjes së garancisë, ku janë të specifikuara në detaje çdo kusht, çdo detaj i bashkëpunimit”.
Tutje, Këpuska shpjegoi se presin që mundësitë e Fondit Kosovar për Garanci Kreditore, që ka pesë vite që është krijuar, të shfrytëzohen akoma më shumë në vendin tonë.
