Situata me Covid-19 në Kosovë ka më shumë se dy javë që është rënduar.
Numri i të vdekurve dhe të infektuarve vazhdon të jetë i lartë.
Derisa spitalet jo vetëm në Qendrën Klinike Universitare të Kosovës por edhe në ato rajonale vazhdojnë të jenë të stërmbushura.
Infektimit nga ky virus nuk po i shpëtojnë as gratë shtatzëna.
Vetëm në 24 orët e fundit dy prej tyre nga Klinika e Gjinekologjisë në QKUK janë transferuar në Mjekim Intensiv.
Kjo, është bërë e ditur për Front Online, nga drejtori i kësaj klinike, Jakup Ismaili.
“Gjatë 24 orëve të fundit i kemi bërë dy transfere në Mjekim Intensiv, pasi që gjendja e tyre ka qenë më e rëndë”, ka deklaruar Ismaili.
Ndërsa, ka bërë të ditur edhe numrin e grave shtatzëna të cilat janë duke u trajtuar në Gjinekologji.
“Në klinikën e Gjinekologjisë aktualisht janë të hospitalizuara dhjetë gra shtatzëna, gjendja e tyre sot është stabile, ka lëshime, ka pranime. Tri gra shtatzëna, prej dhjetë që e ceka më lartë sot kanë lind”, është shprehur drejtori Ismaili.
Ai, ka treguar edhe numri i atyre që janë me oksigjenoterapi.
“Pesë gra shtatzëna janë me oksigjenoterapi”, ka deklaruar ndër të tjera ai.
Në 24 orët e fundit në Kosovë nga Covid-19 kanë vdekur 26 qytetarë, ndërsa janë regjistruar edhe një mijë e 448 raste të reja.
