Ka hyrë sonte në fuqi ora policore, prej orës 22:00 deri 05:00, në pajtim me masat kundër COVID-19 në Kosovë, nga data 30 gusht deri më 13 shtator.
Në qendër të Prishtinës shihen ende automjete dhe qytetarë duke lëvizur edhe pas orës 22:00, por jo edhe prania e policisë.
Ajo që vërehet është se pjesa më e madhe e qytetarëve janë të pajisur me maska për mbrojtje kundër COVID-19, por ka edhe prej atyre që nuk e bëjnë një gjë të tillë.
Sipas masave qeveritare antiCOVID-19, nga masa e ndalim-qarkullimit përjashtohen rastet e natyrës urgjente (për të kërkuar ndihmë mjekësore, blerje të barnave, për të ofruar kujdes ose ndihmë mjekësore, për të shmangur dëmtimin ose për t’i shpëtuar një rreziku lëndimi); qarkullimit për personelin shëndetësor, të sigurisë dhe operatorët që kryejnë punë apo shërbime publike; personelin e ndërrimit të natës të operatorëve ekonomikë që sigurojnë funksionimin e zinxhirit të furnizimit (përfshirë transportin e mallrave/shërbimeve), por me kusht që të pajisen me leje të veçantë nga sistemi EDI i Administratës Tatimore të Kosovës, personave ndaj të cilët aplikohet leja e veçantë e përkohshme, për shkak të ngjarjes së rëndësisë së veçantë.
Gjatë periudhës 30 gusht-13 shtator, kur pritet vlerësimi i ri i situatës, qytetarët janë të obliguar të bartin maska gjithandej, përveç gjatë ngasjes së automjetit vetëm, apo kur në automjet janë prezentë ekskluzivisht anëtarët e ngushtë të familjes; gjatë vrapit, çiklizmit dhe ushtrimeve fizike dhe; gjatë ngrënies apo pijes.
Bibliotekat, kinematë, qendrat rinore, muzetë, qendrat e kulturës me grupe apo institucionet tjera të ngjashme vartëse të MKRS-së apo Komunave, pezullojnë aktivitetin deri më 13 shtator. Teatrot, orkestrat, ansamblet, baleti lejohet të organizojnë shfaqje online (pa prezencë të publikut) si dhe të mbajnë ushtrimet.
Me masat e reja, ndalohet hyrja në mjetet e transportit publik pa maskë. Operatorët e transportit rrugor të udhëtareve lejohen të punojnë duke shfrytëzuar 50% të kapacitetit të ulëseve. Ndërsa në taksi lejohen të udhëtojnë deri në dy udhëtarë.
Po ashtu, ndalohen shërbimet në gastronomi në hapësirat e mbyllura. Qëndrimi i klientëve (shërbimi i ushqimit dhe pijeve) lejohet vetëm në hapësirat e hapura të lokaleve të gastronomisë. Lejohet shfrytëzimi i jo më shumë se 70 % e kapacitetit të hapësirës së hapur. Sipërfaqja llogaritet për zonën ku shërbehet ushqimi dhe pijet.
Kosova në 24 orët e fundit ka shënuar 20 viktima nga COVID-19, ndërsa dje 36, një rekord i zi që pas paraqitjes së rasteve të para në mars të vitit të kaluar.
Ndryshe, varianti delta i koronavirusit, i pranishëm edhe në Kosovë është shumë më i përhapur sesa variantet e kaluara. Përqendrimi i tij është gati 1000 herë më i lartë në zgavrat e hundës dhe të gojës ku bëhet edhe përhapja më e shpeshtë prej personit në person.
